సీమాంధ్ర పదబంధం పుట్టుక: కొత్త పదాల దేవులాట - Kasula Pratap Reddy on the usage of Telugu language

 సీమాంధ్ర పదబంధం పుట్టుక: కొత్త పదాల దేవులాట

కొత్త పదాలు (New Words), పదబంధాలు ఎలా పుడుతాయి? ఎలా వాడకంలోకి, ప్రచారంలోకి వస్తాయి? ఎవరు సృష్టించారో, ఏ అవసరం కోసం సృష్టించారో తెలియకుండానే కొన్ని పదాలు, పదబంధాలు విశేషంగా వాడుకలోకి వచ్చి, సమాజంలో స్థిరపడిపోతాయి. నిజానికి, మీడియాలో కొత్త పదాలూ పదబంధాల పుట్టుక నిత్యం జరుగుతూ ఉంటుంది. భాషతో ప్రయోగాలు జరుగుతుంటాయి. ప్రజలకు అర్థమయ్యే రీతిలో చెప్పడానికే ఈ ప్రయోగాలకు ఎక్కువ ప్రాధాన్యం ఉంటుంది. అందుకు భాష (Laguage)పై పట్టు ఉండాలి. అవసరం కోసం కొత్త పదాన్ని, పదబంధాన్ని సృష్టించడానికి అది అవసరం. 

నేను వన్ ఇండియా తెలుగు చానెల్ సంపాదకుడిగా పనిచేసిన కాలంలో తెలంగాణ రాష్ట్ర ఏర్పాటు ఉద్యమం (Telangana Movement) పెద్ద యెత్తున సాగుతున్నది. తెలంగాణేతర ప్రాంతాన్ని చెప్పడానికి నాకు ఓ పదబంధం అవసరమైంది. ఆంధ్ర ప్రాంతం (Andhra Region) అనేస్తే రాయలసీమ (Rayalaseema)కు అన్యాయం చేసినట్లవుతుంది. అది రాయలసీమ ప్రత్యేకత పట్ల నాకున్న గౌరవం వల్ల, రాయలసీమ పట్ల నాకున్న ప్రేమ వల్ల అవసరమనిపించింది. చాలా ఆలోచించాను. రాయలసీమ, కోస్తాంధ్ర (Coastal Andhra) అనే రెండు పదాలు వాడడం వల్ల శీర్షికకు బిగువు రావడం లేదు, పైగా అది పెద్దగా అవుతున్నది. రాయల ఆంధ్ర అని వాడుదామని అనుకున్నాను. రాయల ఆంధ్ర అంటే కేవలం రాయలసీమకే పరిమితమవుతుంది. రాయలు పాలించిన ఆంధ్ర కాబట్టి అని అలా అనుకున్నాను. 

చివరకు సీమాంధ్ర (seemandhra) అని నిర్ధారించుకున్నాను. సీమ అనేది ప్రాంతం అనే అర్థాన్ని ఇస్తున్నప్పటికీ నాకు సీమ అంటే రాయలసీమ అనే అర్థాన్ని రూఢి చేసుకుంటారని అనుకున్నాను. దాంతో సీమాంధ్ర పదాన్ని నా వార్తాకథనాల్లోనూ, వ్యాసాల్లోనూ వాడుతూ వచ్చాను. అలా సీమాంధ్ర అనే పదబంధం పుట్టి విరివిగా వాడుకలోకి వచ్చింది. తెలంగాణేతర తెలుగు ప్రాంతాన్ని చెప్పడానికి సీమాంధ్ర పదాన్ని అన్ని వర్గాల వారు వాడడం ప్రారంభించారు. ఇది నాకొక గౌరవం.

ఇక మరో విషయం.. నేను ఉదయం దినపత్రిక (Udayam Daily) హైదరాబాద్ సిటీ (Hyderabad city) స్పెషల్ ఇంచార్జీగా పనిచేస్తున్నప్పుడు జరిగింది. ఇప్పుడు సచివాలయం గేటు ఎదురుగా హుస్సేన్ సాగర్ వైపు టెంట్లు వేసుకుని దీక్షలు చేసేవారు. రెలే నిరాహార దీక్షలు, ధర్నాలు జరిగేవి. కొన్ని పదుల రోజులు రెలే నిరాహార దీక్షలు సాగుతుండేవి. రెలే నిరాహార దీక్ష ప్రారంభమైన రోజు వార్త మాత్రమే వస్తూ ఉండేది. ఆ తర్వాత మీడియా (అప్పుడు ప్రధానంగా పత్రికలే) పట్టించుకునేది కాదు. నాకు అది నచ్చలేదు. 

స్థానిక విలేకరికి చెప్పి ఎవరి దీక్ష ఎన్ని రోజులకు చేరుకుంది. రోజువారీగా వార్త రాయాలని చెప్పాను. అలా వచ్చిన వార్తను ధర్నా చౌక్ (Dharna Chowk) అనే శీర్షిక కింద ప్రచురించేవాళ్లం. నేను రిపోర్టింగ్ ఇంచార్జీగా ఉంటే, దొడ్డా శ్రీనివాస్ రెడ్డి డెస్క్ ఇంచార్జీగా ఉండేవాడు. నా ప్రతిపాదనకు శ్రీనివాస్ రెడ్డి అంగీకరించి, ధర్నా చౌక్ ను కొనసాగించాడు. ధర్నా చౌక్ అనే ఇప్పుడు అందరూ వాడుతున్నారు. ఇప్పుడు ఆ ధర్నా చౌక్ ఇందిరా పార్కు (Indira Park) వద్దకు మారింది. మరింతగా అది ప్రజల పట్టింపు నుంచి జారిపోయింది.  

అలాగే మరో ప్రతిపాదన కూడా అమలులోకి వచ్చింది. ఉష్ణోగ్రత కాలమ్ ఉండేది. ఏ కాలానికి తగినట్లుగా ఆ కాలం శీర్షిక పెట్టాలని ప్రతిపాదించాను. చలికాలంలో చలిపులి శీర్షిక కింద ఉష్ణోగ్రత వివరాలను ప్రచురించేవాళ్లం. చలిపులి అంతకు ముందు వాడకంలో ఉన్నదే గానీ మేం వాడిన తర్వాత విశేషమైన ప్రచారంలోకి వచ్చింది.

అలాగే ‘యాది’ అనే పదం చాలా తక్కువ వాడుకలో ఉండేది. తెలంగాణ కథ -  దేవులాట అనే పుస్తకం అచ్చేసినప్పుడు దాన్ని బియ్యాల జనార్దన్ రావు (Biyyala Janardhan Rao)కు అంకితం ఇవ్వాలనేది ఆలోచన. ‘తెలంగాణ దేవులాటలో కాలం చేసిన బియ్యాల జనార్దన్ రావును యాది చేసుకుంటూ’ అని అంకితం వాక్యాలను రాశాను. మరో మాట, దేవులాట అనే పదాన్ని వెతుకులాటకు పర్యాయంగా నేను విరివిగా వాడుతూ వచ్చాను. యాది అనే పదం విరివిగా  వాడుకలోకి వచ్చి ప్రాచుర్యంలోకి వచ్చింది.  

-  కాసుల ప్రతాపరెడ్డి (Kasula Pratap Reddy)

‘మా భూమి’తో సుప్రభాతం వీక్లీ ఢీ.. Kasula Pratap Reddy on Suprabhatam experince, Gaddar Cover story

 ‘మా భూమి’తో సుప్రభాతం వీక్లీ ఢీ

సామాజిక, రాజకీయ వారపత్రిక సుప్రభాతం (Suprabhatam) అంటే నాకు ఇప్పటికీ ఎంతో మక్కువ. అసిస్టెంట్ ఎడిటర్ హోదాలో నాకు సంపాదకీయ బాధ్యతలు ఇక్కడే అందాయి. సుప్రభాతం అప్పట్లో ఇండియా టుడే (India Today)తో పోటీ పడే స్థాయికి వచ్చింది. అయితే, చాలా అనూహ్యమైన పరిస్థితిలో సుప్రభాతం ఎడిటోరియల్ బాధ్యతలు నిర్వహించే అవకాశం నాకు దక్కింది. వాసుదేవరావు (Vasudeva Rao)గారు ఎడిటోరియల్ బాధ్యతలు చూస్తుండేవారు. ఆయన హోదా అసోసియేట్ ఎడిటర్. ఎడిటర్ అప్పుడూ ఆ తర్వాతా లావు రత్తయ్య (Lavu Rattaiah)గారే. 

ఏబీకే ప్రసాద్ (ABK Prasad) గారు సంపాదకుడిగా ‘మా భూమి’ (Maa Bhoomi) సామాజిక రాజకీయ వార పత్రిక ప్రారంభం అవుతుండడంతో వాసుదేవరావుగారు ఆ పత్రికకు వెళ్లిపోయారు. వద్దని ఎంత చెప్పినా ఆయన వినలేదు. ఇక నుంచి వర్కింగ్ ఎడిటర్ అంటాను. వర్కింగ్ ఎడిటర్ పోస్టు ఖాళీ అయింది. ఎవరైనా పెద్దవారిని రత్తయ్యగారు తెచ్చి పెడుతారేమోనని అనుకున్నాను. అప్పుడు శ్రీపతినాయుడు (Sripathi Naidu)గారు కూడా సుప్రభాతంతో ఉండేవారు. ఆయన చాలా సీనియర్. నేను ఉదయం దినపత్రికలో ట్రైనీ రిపోర్టర్ గా చేరినప్పుడు ఆయన సీనియర్ రిపోర్టర్. ఆయనను ఎడిటోరియల్ బాధ్యతలు తీసుకోవాల్సిందని అడిగారు. ఆయన ఇష్టపడలేదు. అన్ని విధాలుగా పని చేయడానికి మేమంతా ఉన్నాం, మీరు తీసుకోండి అని అందరం ఒత్తిడి పెట్టాం. అయినా ఆయన వినలేదు. 

నేను అప్పటికి రిపోర్టర్ గా పనిచేస్తూ ఉన్నాను. సాయిబాబా (saibaba)గారు సుప్రభాతం యాజమాన్య బాధ్యతలు నిర్వహిస్తూ ఉండేవారు. ఆయనను నన్ను ఓ రోజు పిలిచి ‘మీరు వాసుదేవరావుగారి ప్లేస్ తీసుకోండి’ అని చెప్పారు. నాకు ఆశ్చర్యం వేసింది. ‘నిజంగానా?‘ అని అడిగాను. ‘నిజమే’ అన్నారు. ‘అవతల కొండంత జర్నలిస్టు ఏబీకేగారు ఉన్నారు. వాసుదేవరావుగారు కూడా అక్కడే ఉన్నారు. నేను వారితో పోటీ పడగలనా? బాగానే ఆలోచించారా? నాకు భయంగా ఉంది’ అని అన్నాను.

‘మీకేం భయం అక్కరలేదు. నేను ఉన్నాను కదా.. మీ మీద నమ్మకంతోనే ఈ నిర్ణయానికి వచ్చాం’ అన్నారు. ‘రత్తయ్యగారు ఏమంటారో’ అన్నాను. ‘మేమంతా చర్చించుకున్న తర్వాతనే ఈ నిర్ణయానికి వచ్చాం’ అన్నారు. భయం భయంగానే అంగీకరించాను. ఆ తర్వాత కొత్త బాధ్యతలు చేపట్టాను. నాకు ‘మా భూమి’ మొదటి సంచికతోనే దిగులు ప్రారంభమైంది. ‘మా భూమి’తో పోల్చి చూసే విధంగా ‘సుప్రభాతం’ ఉండకూడదనే నిర్ణయానికి వచ్చాను. ఏం చేయాలా అని ఆలోచించసాగాను.

సీనియర్ ఫొటో జర్నలిస్టు బీకే రమేశ్ (BK Ramesh) మాకు ఫొటోలు ఇచ్చేవారు. మా భూమికి కూడా ఆయన ఏర్పాటయ్యారు. ‘మా భూమి’కి ఫొటోలు ఇచ్చి రమేశ్ నా వద్దకు వచ్చాడు. (రెండు ఆఫీసులు పక్కపక్క భవనాల్లోనే ఉండేవి). అప్పుడే నా వ్యూహం ఖరారైంది. ఎట్టి పరిస్థితిలోనూ సుప్రభాతం పత్రికను మా భూమితో పోల్చేందుకు పాఠకులకు అవకాశం ఇవ్వకూడదని అనుకున్నాను. పాఠకుల్లో ఏబీకేకు ఉన్న క్రేజ్ అందరికీ తెలిసిందే. నేనేమో అనామకుడిని. 

చాలా సాధారణంగా, ఏమీ ఎరుగనట్లగా ‘వాళ్లు ఏ ఫోటోలు తీసుకున్నారు?’ అని రమేశ్ ను అడిగాను. బ్యాగ్ లోంచి ప్రింట్ తీసి చూపించారు. (కవర్ పేజీ మీద వేయడానికి పెద్ద ప్రింటవుట్ తీసుకుంటాం.)  అప్పటి ముఖ్యమంత్రి నారా చంద్రబాబు నాయుడు (Chandrababu Naidu) గడ్డపార పట్టుకుని నేలను తవ్వుతున్నట్లుగా ఉన్న ఫొటో. నాకు మా భూమి కవర్ స్టోరీ దాదాపుగా తెలిసిపోయింది. అప్పుడు ప్రజల వద్దకు పాలన నడుస్తున్నది. దానిపై కవర్ స్టోరీ చేస్తున్నారని నాకు తెలిసిపోయింది. 

ఏం చేయాలా అని ఆలోచిస్తుండగా ఓ మెరుపు మెరిసింది.  విషయం రత్తయ్యగారికి చెప్పాను. ఇప్పుడెందుకు అన్నారు. నా ఆలోచన ఏమిటో చెప్పాను. సరేనన్నారు. అంతే, నేను గద్దర్ (Gaddar) అపాయింట్ మెంట్ తీసుకున్నాను. ‘నాకు రోజంతా టైమ్ కావాలి’ అని గద్దర్ కు చెప్పాను. సరేనన్నారు. నా వద్దనే రిపోర్టర్ గా పనిచేస్తున్న రమణకుమార్ ను తీసుకుని గద్దర్ ఇంటికి వెళ్లాను. రోజంతా ఇంటర్వ్యూ చేశాం. మధ్యలో మటన్ తో గద్దర్ ఇంట్లో లంచ్. మాతో పాటు గద్దర్ మేనల్లుడు సత్యం ఉన్నారు. గద్దర్ ఫొటోలను అన్నింటినీ ఆయన సేకరించి భద్రపరుస్తూ వచ్చారు. ఆయన మా కోసం తీసిన ఫొటోలతో పాటు అతని వద్ద ఉన్న అరుదైన ఫొటోలను కూడా తీసుకున్నాం. 

ఒక ప్రజా వాగ్గేయకారుడిగా గద్దర్ మారిన పరిణామ క్రమాన్ని ప్రధాన కథనంగా రాసి, కొన్ని సైడ్ స్టోరీస్ రాశాం. ప్రధాన కథనం నేను రాశాను. కొన్ని సైడ్ స్టోరీస్ రమణ రాశాడు. మొత్తంగా ఒక అద్భుతమైన కవర్ స్టోరీ తయారైంది. శీర్షిక కోసం చాలా ఆలోచించాను. చివరికి ‘కన్నీటి పాట’ అని ఖరారు చేశాను. పాట పాడుతూ వేదిక మీద నాట్యం చేసే గద్దర్ ప్రేక్షకులను కట్టి పడేసేవాడు. ఆయన పాటలు విన్న ప్రతి ఒక్కరూ ఎలాంటి భావనకు గురయ్యేవారో నేను చెప్పాల్సిన అవసరం లేదు. అంత ఉగ్రరూపి, పోరాట యోధుడి కథనానికి ‘కన్నీటి పాట’ ఏమిటనే ప్రశ్న వస్తుందని తెలుసు. అయినా దానికే నేను కట్టుబడ్డాను. 

దాంతో ‘మా భూమి’ మొదటి సంచికతోనే గెలిచేశాను. గద్దర్ ముఖచిత్రంతో వచ్చిన సుప్రభాతం సంచిక చెప్పనలవి కాని రీతిలో అమ్ముడుపోయింది. గద్దర్ ముఖచిత్రంతో వార్తాకథనం రాసిన సందర్భాన్ని చాలా మంది ప్రశ్నించారు. ఇప్పుడు ఆ కథనం రాయాల్సిన సందర్భం ఏమిటని అడిగారు. ఇప్పటి వరకు నేను ఎవరికీ సమాధానం చెప్పలేదు. ఆ సందర్భం ఏబీకే (ABK) గారు కల్పించారు. 

ఏబీకేగారిని ఎదుర్కోవడానికి వ్యూహం సిద్ధం చేసుకున్నానని చెప్పాను కదా. ఆ తర్వాత నేను మందక్రిష్ణ మాదిగ (Manda Krishna Madiga)ఇంటర్వ్యూ అడిగాను. చాలా రోజులుగా సరేనంటూ దాటవేస్తూ వస్తున్నారు. అకస్మాత్తుగా నాకు ఓ రోజు ‘మా భూమి’ ఆఫీసుకు వెళ్తూ కనిపించారు. నాకు అర్థమైపోయింది. ‘మా భూమి’కి ఇంటర్వ్యూ ఇవ్వబోతున్నారని తెలిసిపోయింది. ఆయనను ఇంటర్వ్యూ చేసిన విషయం కూడా నాకు చేరింది. వెంటనే నేను పొనుగోటి క్రిపాకర్ (Ponugoti Krupakar) ను సంప్రదించాను. సుప్రభాతంలో క్రిపాకర్ ఇంటర్వ్యూ ప్రచురించాను. 

మా డెడ్ లైన్ మా భూమి డెడ్ లైన్ కన్నా ఒక్క రోజు ముందు. దాంతో కొన్ని తంటాలు కూడా వచ్చేవి. చంద్రబాబుతో విభేదించిన నందమూరి హరిక్రిష్ణ (Nandamuri Harikrishna)పార్టీ పెట్టబోతున్నారు. మా డెడ్ లైన్ తర్వాతి రోజు ఆయన అధికారిక ప్రకటన చేయబోతున్నారు. ‘మా భూమి’ కవర్ స్టోరీ కచ్చితంగా హరిక్రిష్ణ పెడుతున్న పార్టీ మీదే ఉంటుంది. నాకు కొంత సంకటన పరిస్థితి ఏర్పడింది. సుప్రభాతం డెడ్ లైన్ రోజు నేను హరిక్రిష్ణను సంప్రదించాను. ఆయన రమ్మన్నారు. వెంటనే ఆహ్వానం హోటల్ కి వెళ్లి ఆయన ఇంటర్వ్యూ చేసి, దాన్ని రాసి పేజీల్లోకి ఎక్కించాను. పత్రికను సిద్ధం చేసి ప్రెస్ కు పంపడానికి చాలా పొద్దుపోయింది. అలా ‘మా భూమి’ కథనం పట్ల పాఠకులకు ఆసక్తి తగ్గించాలనే ఉద్దేశంతో ఆ పని చేశాను. నా ఆలోచన ఫలించింది. 

ఇలా చాలా కథనాల విషయంలో నేను ‘మా భూమి’ కథనాలను ఢీకున్నాను. అంతేకాదు, పత్రికారంగంలో దిగ్గజమైన ఏబీకెనూ ఎదుర్కున్నాను. అత్యంత క్లిష్టమైన పరిస్థితిలో నన్ను ఆదుకున్న వాసుదేవరావుగారిని ఎదుర్కోవడానికి కూడా సిద్ధపడ్డాను. ఆయన మీద నా గౌరవం ఇసుమంత కూడా తగ్గకుండానే నేను ఆ పనిచేశాను. ఇంకా చెప్పాలంటే చాలా ఉన్నాయి. అప్పుడు నాది 36 ఏళ్ల వయస్సు. ఆ వయస్సులో నేను చేసిన సాహసం అది.

ఆ తర్వాత ‘మా భూమి’ ఏమైందో, సుప్రభాతం ఏమైందో అందరికీ తెలుసు. కానీ ఇప్పటికీ సుప్రభాతం వంటి ఓ వీక్లీ లేదా పక్షపత్రిక లేదా మాస పత్రిక ఉండాలనేది నా కోరిక. రత్తయ్యగారు ఎక్కడలైని స్వేచ్ఛను ఇచ్చారు. దాన్ని నేను దుర్వినియోగం చేయలేదు. గద్దర్ కథనాన్ని రత్తయ్యగారు తన ఆత్మకథలో కూడా ప్రస్తావించారు. 

పత్రికా నిర్వహణలో నాకు సహకరించిన శ్రీపతి నాయుడికి, ఇతర సిబ్బందికి నేను ఎప్పుడూ రుణపడే ఉంటాను. కందుకూరి రమేశ్ బాబు మంచి కథనాలు రాయడమే కాకుండా పేజీ లేఅవుట్ లో కొత్త లుక్ ను చూపించడంలో సహకరించాడు.

- కాసుల ప్రతాపరెడ్డి (Kasula Pratap Reddy)

చంద్రబాబు ఇమేజ్ పై భారీ దెబ్బ ... Kasula Pratap Reddy on Chandrababu image change due Tirupati Laddu controversy

 చంద్రబాబు ఇమేజ్ పై భారీ దెబ్బ

ఆంధ్రప్రదేశ్ ముఖ్యమంత్రి (AP CM), టీడీపీ (TDP) అధినేత నారా చంద్రబాబు నాయుడి (Nara Chandrababu Naidu) ఇమేజ్ మారిపోతున్న సూచనలు కనిపిస్తున్నాయి. ఇప్పటి వరకు చంద్రబాబు (Chandrababu) అంటే అభివృద్ధికి పెట్టింది పేరు. హైదరాబాద్ లో హైటెక్ సిటీ (Hitech City) నిర్మాణానికి, సాఫ్ట్ వేర్ రంగం విస్తరణకు చంద్రబాబు కారణమని భావించేవాళ్లు చాలా మంది ఉన్నారు. సాఫ్ట్ వేర్ ఇంజనీర్లు వాస్తవాస్తవాలను పక్కన పెట్టి చంద్రబాబును ఆరాధిస్తూ ఉంటారు. కానీ తాజాగా ఆయన ఇమేజ్ మారిపోతున్నట్లు కనిపిస్తున్నది. తిరుపతి లడ్డు (Tirupati Laddu) వివాదాన్ని ముందుకు తేవడం ఆయన ఇమేజ్ ను మార్చివేస్తున్నది. 

తిరుపతి లడ్డులో జంతువుల కొవ్వు కలిసిందని ఆయన ఆరోపించారు. వైఎస్సార్ కాంగ్రెస్ పార్టీ (YSR Congress Party) అధ్యక్షుడు, మాజీ ముఖ్యమంత్రి వైఎస్ జగన్మోహన్ రెడ్డి (YS Kagan Mohan Reddy)ని దోషిగా నిలబెట్టాలని దాన్ని ముందుకు తెచ్చారు. చంద్రబాబు వ్యాఖ్యలపై సుప్రీంకోర్టు (Supreme Court) తీవ్రంగా స్పందించింది. రాజ్యాంగ పదవిలో ఉన్న చంద్రబాబు బాధ్యతగా వ్యవహరించాల్సి ఉండిందని అభిప్రాయపడింది. దేవుళ్లను రాజకీయాలకు దూరంగా ఉంచాలని కూడా చెప్పింది. జులైలో నివేదిక వస్తే సెప్టెంబర్ లో చంద్రబాబు ఆ విషయాన్ని మీడియాకు వెల్లడించాల్సిన అవసరం ఏం వచ్చిందని కూడా ప్రశ్నించింది. తాజాగా సుప్రీంకోర్టు స్వతంత్రమైన సిట్ (SIT) ఏర్పాటుకు ఆదేశాలు జారీ చేసింది. దీంతో చంద్రబాబు ఏర్పాటు చేసిన సెట్ రద్దయినట్లే.

తిరుమల లడ్డు (Tirumala Laddu) కల్తీ అంశాన్ని తెరపైకి తెచ్చి వైఎస్ జగన్ ను హిందువులకు దూరం చేయాలనేది చంద్రబాబు వ్యూహంగా కనిపిస్తున్నది. అయితే, చంద్రబాబు ఆ అంశాన్ని లేవనెత్తగానే జనసేన (Jana Sena) అధ్యక్షుడు, ఉప ముఖ్యమంత్రి పవన్ కల్యాణ్ (Pawan Kalyan) దూకుడు ప్రదర్శించారు. జగన్ ను దెబ్బ తీసి మెజారిటీ హిందువుల మద్దతును సంపాదించుకోవాలనే చంద్రబాబు వ్యూహానికి పవన్ కల్యాణ్ కౌంటర్ వ్యూహం రచించి అమలు చేస్తున్నట్లు కనిపిస్తున్నారు.

పవన్ కల్యాణ్ వేషం మార్చి సనాతన ధర్మ పరిరక్షణ Sanathana Dharma) నినాదాన్ని ఎత్తుకున్నారు. ప్రాయశ్చిత్త దీక్ష చేపట్టారు. విజయవాడ కనకదుర్గ (Vijayawada Kanakadurga) ఆలయ మెట్లను శుభ్రం చేశారు. తిరుమలలో తన దీక్షను విరమించారు. సనాతన ధర్మాన్ని పరిరక్షించడానికి తాను ఎంత దూరమైనా వెళ్తాననే పద్ధతిలో ఆయన వ్యవహరించారు, మాట్లాడారు. దీంతో చంద్రబాబు వ్యూహం కాస్తా బెడిసికొట్టినట్లే చెప్పాలి. చంద్రబాబు వ్యూహం వల్ల జగన్ రాజకీయంగా దెబ్బ తింటే ఆ ఖాళీని భర్తీ చేసి సవాల్ విసరడానికి పవన్ కల్యాణ్ సిద్ధంగా ఉన్నారని అనుకోవాలి. 

ఏపి రాజధాని (AP Capital) అమరావతి (Amaravati)ని నిర్మించి, సాఫ్ట్ వేర్ పరిశ్రమలను తెస్తే చంద్రబాబు బలోపేతం అయ్యే అవకాశాలున్నాయి. అలాగే, విశాఖపట్నానికి (Visakhapatnam) కూడా పరిశ్రమలు తెచ్చి ఉద్యోగావకాశాలు కల్పించాల్సి ఉంటుంది. పోలవరం (Polavaram) ప్రాజెక్టును పూర్తి చేయాల్సి ఉంటుంది. ఇవన్నీ పూర్తి చేస్తూ ప్రజలకు ఇచ్చిన హామీలను అమలు చేయాల్సి ఉంటుంది. ఇవన్నీ చేస్తే తప్ప చంద్రబాబు తిరిగి నిలదొక్కుకోవడానికి వీలు కాదు. ఈ దిశగా చంద్రబాబు ఆలోచిస్తే మంచిదేమో.

- కాసుల ప్రతాపరెడ్డి (Kasula Pratap Reddy)

సమంతపై నీచమైన వ్యాఖ్యలు: క్షమాపణలతో సరిపోతుందా?: Kasula Pratap Reddy on Konda Surekha comments on Samantha

 సమంతపై నీచమైన వ్యాఖ్యలు: క్షమాపణలతో సరిపోతుందా?

మంత్రి కొండా సురేఖ (Konda Surekha)కు ఫైర్ బ్రాండ్ అనే పేరుంది. రాజకీయాల్లో ఆమె దూకుడుకు ప్రతిగా ఆ పేరు వచ్చింది. నిజానికి, సురేఖను విమర్శించడానికి పెద్దగా ప్రత్యర్థుల వద్ద పెద్దగా ఆయుధాలు కూడా లేవు. అయితే, ఆమె మాజీ మంత్రి, బీఆర్ఎస్ (BRS) నాయకుడు కేటీ రామారావు (KT Rama Rao) మీద విరుచుకుపడ్డారు. ఈ క్రమంలో అక్కినేని నాగార్జున (Akkineni Nagarjuna)ను, నాగచైతన్య (Naga Chaitanya)ను, సమంత (Samantha)ను, రకుల్ ప్రీత్ సింగ్ (Rakul Preeth Singh) ను లాగారు. దారుణమైన వ్యాఖ్యలు చేశారు. రాయడానికి కూడా అభ్యంతరకరమైన వ్యక్తిగత వ్యాఖ్యలు చేశారు. నిజానికి, సమంత బాధితురాలు. నాగచైతన్య, ఆమె మూడేళ్ల క్రితం పరస్పర అంగీకారంతో విడాకులు తీసుకున్నారు. కారణాలు ఇవీ అని స్పష్టంగా చెప్పలేం. కానీ తమ ఇరువురి మధ్య  తలెత్తిన విభేదాలతో విడిపోయారని అనుకోవచ్చు. ఇటువంటి విడాకులు అసాధారణమేమీ కాదు. విడాకుల తర్వాత సమంత జీవితంలో పోరాటం చేస్తున్నది. అటువంటి మహిళ మీద కొండా సురేఖ నీచమైన వ్యాఖ్యలు చేశారు. సమంత, నాగచైతన్య విడాకులకు కేటీఆర్ కారణమని చెప్పుతూ ఆమె ఆ వ్యాఖ్యలు చేశారు. 

సాధారణంగానే పురుష ఆధిపత్య సమాజంలో మహిళలు బాధితులు. ఈ విషయాన్ని అవగాహనలోకి తీసుకుని సురేఖ మాట్లాడాల్సింది. సురేఖ పార్లమెంటరీ రాజకీయాల్లోకి వచ్చిన నేపథ్యం కూడా భిన్నమైంది. ఆ భావజాలం సురేఖను మరింత బాధ్యతగా వ్యవహరించడానికి పురికొల్పి ఉండాల్సింది. రాజకీయాల్లో సురేఖ కూడా బాధితురాలే. సెటబ్రిటీల మీద, మహిళా రాజకీయ నాయకుల మీద ఊహాగానాలు చెలరేగుతుంటాయి. ముఖ్యంగా లైంగిక సంబంధాలను ముందుకు తెచ్చి ఈ ప్రచారాలు సాగిస్తూ ఉంటారు. వాటిలో నిజానిజాలు తేలకుండానే అవి ప్రచారంలో ఉండిపోతాయి. వాస్తవం తేలినా కూడా అటువంటి గాలి మాటలు చెలామణిలో ఉంటాయి. సురేఖ ఆ విషయం తెలియనంత అమాయకురాలేమీ కాదు. 

సురేఖ వ్యాఖ్యలను ఖండించడంలో సమంత హుందాగా ప్రవర్తించారు. ఒక్క పొల్లు మాట కూడా అనలేదు. అది ఆమె గొప్పతనాన్ని తెలియజేస్తున్నది. సురేఖ వ్యాఖ్యలపై అక్కినేని నాగార్జున, నాగచైతన్య, నాగార్జున భార్య అమల (Amala) తప్పు పట్టారు. అంతేకాకుండా, జూనియర్ ఎన్టీఆర్ (NTR), నాని (nani)మొదలైనవాళ్లు తీవ్రంగానే స్పందించారు. సురేఖ తీరుపై తీవ్రంగా మండిపడ్డారు. సహజంగానే అటువంటి వ్యతిరేకతను ఎదుర్కునే అనుచిత వ్యాఖ్యలు సురేఖ చేశారు. కేటీఆర్ మీద విమర్శలు చేయడానికి హీరోయిన్లను లాగారు.

బీజేపీ ఎంపీ రఘునందన్ రావు (Raghunandan Rao) సురేఖ మెడలో నూలు దండను వేయడంతో వివాదం ప్రారంభమైంది. ఆ నూలు దండపై సోషల్ మీడియాలో వ్యాఖ్యలు వచ్చాయి. అవి అంత తీవ్రమైన వ్యాఖ్యలేమీ కావు. కానీ ఇదే సమయంలో సురేఖకు సంబంధించి అభ్యంతరకరమైన ఆడియో ఒకటి సోషల్ మీడియాలో వైరల్ అయింది. కొండా సురేఖపై తీవ్రమైన, అనుచితమైన వ్యాఖ్యలు ఉన్నాయి. ఇక్కడ కొండా సురేఖ బాధితురాలు. ఇదంతా కేటీఆర్ (KTR)చేయించారనేది ఆమె అభిప్రాయం. అందుకు కేటీఆర్ లక్ష్యంగా చేసుకుని రాజకీయ ఆరోపణలు చేస్తే ఎవరికీ ఏ విధమైన అభ్యంతరం ఉండకపోయేది. ప్రభుత్వం కూడా తమదే కాబట్టి ఆ ట్రోలింగ్ మీద పోలీసులకు ఫిర్యాదు చేసి, దర్యాప్తు జరిపించి, అందుకు కారణమైనవారికి శిక్ష పడేలా చూసుకోవచ్చు. కానీ సురేఖ తప్పుడు దారిని ఎంచుకున్నారు.   

అన్ని వైపుల నుంచి విమర్శలు రావడంతో సురేఖ వెనక్కి తగ్గారు. సమంతకు క్షమాపణ చెప్పారు. జీవితంపై తుడుచుకోవడానికి కూడా వీలు లేని బురద చల్లి క్షమాపణ చెప్తే సరిపోతుందా అనేది ప్రశ్న. నిజానికి, సురేఖ చేసిన వ్యాఖ్యలు క్షమాపణతో సరిపోయేవి కావు. అత్యంత దిగజారుడు వ్యాఖ్యలు చేశారు. సురేఖ ఇలా మాట్లాడడం గతంతో దాదాపు ఎప్పుడూ లేదు. బీఆర్ఎస్ నుంచి బయటకు వచ్చిన సమయంలో కేటీఆర్ మీద, కేసీఆర్ (KCR) మీద తీవ్రమైన వ్యాఖ్యలే చేశారు. కానీ ఎక్కడా నీచత్వం కనిపించలేదు. 

సురేఖ అంత అభ్యంతరకరమైన వ్యాఖ్యలు చేయడానికి కేవలం తనపై జరిగిన ట్రోలింగ్ మాత్రమే కారణమా అనే ప్రశ్న ఉదయిస్తోంది. ఉమ్మడి వరంగల్ జిల్లాలో కొండా సురేఖ అధిపత్యం బలంగా ఉంది. అయితే ముఖ్యమంత్రి రేవంత్ రెడ్డి మంత్రి సీతక్క (Seethakka) ప్రాబల్యాన్ని పెంచడానికి ప్రయత్నిస్తున్నారనే ప్రచారం జరుగుతున్నది. దీంతో సురేఖ తీవ్రమైన ఒత్తిడికి గురువుతున్నారనే మాట కూడా వినిపిస్తున్నది. ఆమె అనుచిత వ్యాఖ్యల వెనక ఆ ఒత్తిడి కూడా ఉందా అనే అనుమానాలు వ్యక్తమవుతున్నాయి.

- కాసుల ప్రతాపరెడ్డి (Kasula Pratap Reddy)

తిరుపతి లడ్డూ వివాదం: చంద్రబాబుకు షాక్: Tirupati Laddu: Keep Gods away from politics, says Supreme Court

తిరుపతి లడ్డూ వివాదం: చంద్రబాబుకు షాక్ 

తిరుపతి లడ్డూ (Tirupatho laddoo) వివాదంలో ఆంధ్రప్రదేశ్ ముఖ్యమంత్రి (Andhra Pradesh CM) నారా చంద్రబాబు నాయుడి (Nara Chandrababu Naidu)కి సుప్రీంకోర్టు షాక్ ఇచ్చింది. చంద్రబాబు తీరును ప్రశ్నించింది. దేవుళ్లను రాజకీయాలకు అతీతంగా ఉంచాలని అభిప్రాయపడింది. తిరుమల లడ్డూ (Tirumala Laddoo) వివాదంపై దాఖలైన పిటిషన్లపై సుప్రీంకోర్టు (Supreme Court) న్యాయమూర్తులు జస్టిస్ బీఆర్ గవాయి, జస్టిస్ కేవీ విశ్వనాథన్ బెంచ్ సోమవారం విచారణ చేపట్టింది. 

దేవుడిని రాజకీయాల్లోకి లాగవద్దని, చంద్రబాబు మీడియా వద్దకు ఎందుకు వెళ్లారని, రాజ్యాంగ పదవిలో ఉన్నప్పుడు బాధ్యతగా ఉండాలి కదా అని, జులైలో నివేదిక వచ్చిందని, సెప్టెంబర్ లో చంద్రబాబు మీడియాకు ఎందుకు చెప్పారని, సీట్ ఎందుకు వేశారని మీడియా వ్యాఖ్యలు చేసింది.  నివేదికను వెల్లడించిన సమయాన్ని సుప్రీంకోర్టు ప్రశ్నించింది.. 

ల్యాబ్ ఆధారాలు మీ వద్ద ఉన్నాయా, నెయ్యిని రిజెక్ట్ చేశారని ఈవో చెప్పారు కదా. ఇదంతా పబ్లిక్ డొమైన్ లో ఉంది కదా అని కూడా సుప్రీంకోర్టు న్యాయమూర్తులు అన్నారు. ఇది ఒక రకంగా చంద్రబాబుకు ఎదురు దెబ్బనే. 

సీనియర్ న్యాయవాది కపిల్ సిబల్ (Kapil Sibal) అందుబాటులో లేకపోవడంతో విచారణ మధ్యాహ్నం ఒంటి గంటకు ప్రారంభమైంది. బీజేపి (BJP) నేత సుబ్రహ్మణ్య స్వామి (Subrahmanian Swamy) వాదనలు వినిపించారు.

‘మీరు రాజ్యాంగబద్ధమైన పదవిలో ఉన్నారు. రాజకీయాలను మతానికి దూరంగా ఉంచుతారని అనుకుంటాం. తిరుపతి లడ్డూలో కల్తీ నెయ్యి వాడారనే ఆరోపణపై మీరు విచారణకు ఆదేశించారు. అటువంటప్పుడు ఆ విషయంపై మీడియాతో మాట్లాడాల్సిన అవసరం ఏముంది’ అని సుప్రీంకోర్టు చంద్రబాబును ప్రశ్నించింది. 

‘ల్యాబ్ నివేదిక జులైలో వచ్చింది. మీరు సెప్టెంబర్ లో ప్రకటన చేశారు. పైగా నివేదిక స్పష్టంగా లేదు’ అని అన్నది. తిరుపతి లడ్డూకు వాడిన నెయ్యిలో కొవ్వు కలిసిందని, అందుకు మాజీ ముఖ్యమంత్రి వైఎస్ జగన్మోహన్ రెడ్డి బాధ్యుడని అంటూ చంద్రబాబు సెప్టెంబర్ 20వ తేదీన చేసిన వ్యాఖ్యలపై సుప్రీంకోర్టు తీవ్ర అసమ్మతిని తెలియజేసింది. చంద్రబాబు సంయమనం పాటించాల్సి ఉండిందని అభిప్రాయపడింది.

- కాసుల ప్రతాపరెడ్డి (Kasula Pratap Reddy)

తిరుపతి లడ్డూ వివాదం: ఓ బాబాజీ కెవ్వు కేక: Kasula Pratap Reddy on Pawan Kalyan Sanathana Dharma

 తిరుపతి లడ్డూ వివాదం: ఓ బాబాజీ కెవ్వు కేక

తిరుపతి లడ్డూ (Tirupathi Laddu) కల్తీ అయిందని ఆంధ్రప్రదేశ్ ముఖ్యమంత్రి (AP CM), టీడీపీ (TDP) అధ్యక్షుడు నారా చంద్రబాబు నాయుడు (Nara Chandrababu Naidu) అంటూ వెంకటేశ్వరస్వామి (Venkateswara Swami)యే తన చేత నిజం చెప్పించారని అన్నారు. ఒక రకంగా ఆయన దేవదూత పాత్రను పోషించడానికి పూనుకున్నారు. ఏపీ ఉప ముఖ్యమంత్రి (AP deputy CM), జనసేన (jana Sena) అధినేత పవన్ కల్యాణ్ ఓ అడుగు ముందుకు వేశారు. వేషం మార్చి హిందూ ధర్మ పరిరక్షకుడి పాత్రను పోషిస్తున్నారు. ప్రాయశ్చిత్త దీక్షను చేపట్టి విజయవాడ అమ్మవారి గుడి (Vijayawada Kanakadurga Temple) మెట్లను శుద్ధి చేశారు. ఈ స్థితిలో పవన్ కల్యాణ్ నటించిన చిత్రంలోని కేవ్వు కేక (Kevvu Keka) పాట గుర్తుకు రావడం అంత సబబు కాదేమో. కానీ గుర్తుకు వచ్చింది. సినిమాల్లో నటులు తమకు ఏ పాత్ర ఇస్తే ఆ పాత్ర పోషిస్తారు. ఇందులో నటుడిని తప్పు పట్టాల్సిన అవసరం లేదు. 

సనాతన ధర్మాన్ని రక్షించడానికి పూనుకున్న పవన్ కల్యాణ్ చర్య మత విభేదాలను రెచ్చగొట్టే విధంగా ఉందనే విమర్శ వినిపిస్తున్నది. అయితే, ఆయన అన్ని మతాలను గౌరవిస్తానని కూడా చెప్పుతున్నారు. ఇందుకు ఆయనను అభినందించాలి. సర్వమత సమానత్వం అనే విషయాన్ని ఆయన బోధిస్తున్నారు. అయితే, అందుకు ఆయన వేషం మార్చి సనాతన ధర్మ పరిరక్షణను ఒక యుద్ధ  ప్రాతిపదికన చేపట్టాల్సిన అవసరం ఉందా అనేది ప్రశ్న. ఉందని ఆయన భావిస్తూ ఉండవచ్చు. మనకేమీ అభ్యంతరం లేదు. కానీ  ప్రజలు మాత్రం అప్రమత్తంగా ఉండాల్సిందే.

తిరుపతి లడ్డూ కల్తీ జరిగిందనే నేపథ్యంలో ఆయన తన కార్యాచరణకు పదును పెట్టారు. కల్తీ విషయం తేల్చడానికి తగిన ఏర్పాట్లను చేసి, నిగ్గు తేలిస్తే సరిపోతుంది. తప్పు చేసినవారికి తగిన శిక్ష కూడా వేయవచ్చు. ఇదంతా చేయడానికి ఆయనకు వీలు కూడా ఉంది. ఎందుకంటే ఆయన ప్రభుత్వంలో ఉన్నారు. అందుకు అవసరమైన చర్యలను చేపట్టడానికి అవకాశం ఉంటుంది. ముఖ్యమంత్రి చంద్రబాబు కూడా అదే చేయవచ్చు. ఆయన అది చేస్తానని అంటున్నారు. కానీ ఈలోగా రాజకీయంగా వాడుకోవడానికి ఉన్న అవకాశాన్ని ఆయన వాడుకుంటున్నారు. పవన్ కల్యాణ్ కూడా అదే పని చేస్తున్నారని అనుకోవాలి. అంతకు మించి దానికి ప్రాధాన్యం లేదు.

అయితే, పవన్ కల్యాణ్ దగ్గరికి వచ్చేసరికి ఓ విషయం తప్పకుండా ప్రస్తావించాల్సి ఉంది. ఆయన చేగువేరా అన్నాడు. గద్దర్ (Gaddar)ను అభిమానించానని అన్నాడు. ఇంకా చాలా మాటలు చెప్పారు. ఇప్పుడు సనాతన ధర్మం (sanathan Dharma)అంటున్నారు. రాజకీయంగా ఆయనకు ఒక స్పష్టమైన విధానం లేకపోవడాన్ని మనం గమనించవచ్చు. ఎందుకంటే ఆయనకు సారం ముఖ్యం కాదు. భావజాలం కూడా ముఖ్యం కాదు. సనాతన ధర్మం అంటే ఏమిటో అయనకు బహుశా తెలిసే ఉంటుంది. అది మనుషుల మధ్య సమానత్వాన్ని నిరాకరిస్తుంది. ముఖ్యంగా మహిళలకు, దళితులకు సమాన హక్కులను ఇవ్వడానికి అంగీకరించదు. అయితే, ఆధునిక కాలంలో చాలా వరకు అలా కుదరదు. అయితే, ఒక రాజకీయాస్త్రంగా మాత్రం పనికి వస్తుంది.

ఇక్కడ మనం ప్రధానంగా బీజేపీ (BJP) రాజకీయాలను గుర్తు చేసుకోవాలి. దక్షిణ భారతదేశం (South India)లో పాగా వేయడానికి బీజేపీ చాలా కాలంగా ప్రయత్నాలు సాగిస్తున్నది. కర్ణాటకలో చాలా వరకు అది విజయం సాధించగలిగింది. తెలంగాణ (Telangana)లో బీఆర్ఎస్ (BRS) తప్పుడు రాజకీయాల వల్ల దాని ఉనికి కనిపిస్తున్నది. ఇప్పుడు ఆంధ్రప్రదేశ్ వంతు వచ్చింది. ఆంధ్రప్రదేశ్ రాష్ట్రంలో 2014 ఎన్నికల్లో టీడీపీతో పొత్తు వల్ల బీజేపీ కొన్ని సీట్లు సాధించింది. ఆ తర్వాత జరిగిన ఎన్నికల్లో ఒంటరిగా పోటీ చేసి ఏమీ సాధించలేకపోయింది. తాజా ఎన్నికల్లో జనసేన, టీడీపీలతో కలిసి పోటీ చేయడం వల్ల సీట్లను సాధించింది. అయితే, ఇది బీజేపీ నిజమైన బలం కాదు. బీజేపీకి అంతగా పునాది లేదు. ఈ స్థితిలో పవన్ కల్యాణ్ బీజేపీకి ఉపయోగపడే అవకాశం ఉంది. ప్రాంతీయ పార్టీల స్వార్థ రాజకీయ ప్రయోజనాల కారణంగా బీజేపి వివిధ రాష్ట్రాల్లోకి అడుగు పెట్టగలుగుతున్నది. 

పవన్ కల్యాణ్ బీజేపీ మద్దతుతో ఆంధ్రప్రదేశ్ రాజకీయాల్లో పాగా వేయడానికి ప్రయత్నిస్తుండవచ్చు.లేదా పవన్ కల్యాణ్ మద్దతుతో బీజేపీ పాగా వేయడానికి చూస్తుండవచ్చు. ఎలా అయినా, రెండు ఒక్కటే. లేని విభేదాలను ప్రజల మధ్య పాదుకొల్పడమే రాజకీయ పార్టీల ఎత్తుగడ అయితే అది అత్యంత ప్రమాదకరం. 

- కాసుల ప్రతాపరెడ్డి (Kasula Pratap Reddy)

చంద్రబాబుకు షాక్?: పవన్ కల్యాణ్ రివర్స్ గేమ్... Tirupathi laddoo: Kasula Pratap Reddy on Pawan Kalyan Hindu agenda to counter Chanrababu

 చంద్రబాబుకు షాక్?: పవన్ కల్యాణ్  రివర్స్ గేమ్

తిరుపతి లడ్డూ (Tirupati Laddoo) కల్తీ అయిందని ముఖ్యమంత్రి (AP CM) నారా చంద్రబాబు నాయుడు (Nara Chandrababu Naidu) మాజీ ముఖ్యమంత్రి వైఎస్ జగన్మోహన్ రెడ్డి (YS Jagan Mohan Reddy)పై అస్త్రం ఎక్కు పెట్టిన నేపథ్యంలో జనసేన (Jana Sena) అధినేత, ఆంధ్రప్రదేశ్ ఉప ముఖ్యమంత్రి పవన్ కల్యాణ్ (Pawan Kalyan) సరికొత్త ప్రణాళికతో ముందుకు సాగుతున్నారు. హిందూ ఎజెండా (Hindu Agenda)తో ఆయన తన బలాన్ని పెంచుకునే ప్రయత్నం చేస్తున్నారు. ఇది ఒక రకంగా చంద్రబాబుకు ఎసరు తెచ్చే అవకాశాలు కూడా లేకపోలేదు. అది ఎలాగో చూద్దాం.

శాసనసభ ఎన్నికల వరకు పవన్ కల్యాణ్ చంద్రబాబు నియంత్రణలో ఉన్నట్లు కనిపించారు. చంద్రబాబు చెప్పినవారికే ఆయన జనసేన టికెట్లు ఇచ్చారని భావిస్తూ వచ్చారు. పొత్తులో భాగంగా తక్కువ సీట్లకు పరిమితం కావడం, ఆ తక్కువ సీట్లలోనూ టీడీపీ నుంచి వచ్చినవారిని కొంత మందిని జనసేన తరఫున పోటీకి దింపడం వంటి కారణాల వల్ల చంద్రబాబు పవన్ కల్యాణ్ ను వాడుకుంటున్నారనే అభిప్రాయం బలపడుతూ వచ్చింది. నిజానికి చంద్రబాబు ఉద్దేశం కూడా అదే. కానీ ప్రభుత్వం ఏర్పడిన తర్వాత పవన్ కల్యాణ్ రివర్స్ గేమ్ ప్రారంభించినట్లు అర్థమవుతున్నది.

అప్పట్లో ఓ ప్రచారం కూడా జరిగింది. టీడీపీ (TDP)తో పొత్తు పెట్టుకోవడానికి బీజేపీ (BJP) పెద్దలు ససేమిరా అన్నారు. అయితే, పవన్ కల్యాణ్ పట్టుబట్టి బీజేపీ పెద్దలను ఒప్పించి పొత్తుకు ఒప్పించారు. బీజేపీ వ్యూహం (BJP Strategy) మరో రకంగా ఉండడం వల్లనే టీడీపీతో పొత్తుకు బీజేపీ పెద్దలు అంగీకరించలేదు. అప్పటికే బీజేపీ నాయకత్వంలోని ఎన్డీఎ (NDA)లో చేరిన పవన్ కల్యాణ్ ను ముఖ్యమంత్రి అభ్యర్థిగా ముందు పెట్టి జనసేనతో కలిసి బీజేపీ ఆంధ్రప్రదేశ్ శాసనసభ ఎన్నికల్లో (Andhra Pradesh Assembly Elections) పోటీ చేయాలని భావించింది. అయితే, పవన్ కల్యాణ్ అందుకు అంగీకరించకుండా టీడీపీతో పొత్తుకే పట్టుబట్టాడు. పవన్ కల్యాణ్ ను వదులుకుని ఒంటరిగా వెళ్లడం వల్ల ఫలితం ఉండదని భావించిన బీజేపి పెద్దలు టీడీపీతో పొత్తుకు సిద్ధపడ్డారు. అది బీజేపీకి ప్రయోజనాన్నే చేకూర్చింది. కేంద్రంలో ప్రభుత్వ ఏర్పాటుకు చంద్రబాబు సహకరించారు. 

రాష్ట్రంలో బీజేపి, టీడీపీ, జనసేన కూటమి (TDP, BJP, Jana Sena alliance) ప్రభుత్వం ఏర్పడిన తర్వాత కొంత సమయం తీసుకుని పవన్ కల్యాణ్ తన ప్రణాళికను అమలు చేస్తున్నట్లు కనిపిస్తున్నారు. దీన్ని పసిగట్టే బహుశా చంద్రబాబు తిరుపతి లడ్డూ వివాదాన్ని తెరపైకి తెచ్చి హిందూ పరిరక్షకుడిగా ముందుకు రావడానికి ప్రయత్నించి ఉంటారనే భావన వ్యక్తమవుతున్నది. అయితే, ఇందులో ఎంత వరకు నిజం ఉందనేది చెప్పలేం గానీ పవన్ కల్యాణ్ మాత్రం దాన్ని అంది వచ్చిన అవకాశంగా భావించినట్లు తెలుస్తోంది.

చంద్రబాబును పక్కకి నెట్టడం మాట అలా ఉంచి, హిందూ ఎజెండాతో తన రాజకీయాలు నడిపి బలం పెంచుకోవాలనే ఆలోచనతో పవన్ కల్యాణ్ ముందుకు సాగుతున్నారు. తిరుపతి లడ్డూ కల్తీపై ప్రాయశ్చిత్తం చేసుకుంటున్నారు. తప్పు అవతలి వాళ్లు చేసినప్పటికీ తాను ప్రాయశ్చిత్త దీక్షకు పూనుకున్నారు. దాన్ని ఆయన సమర్థించుకున్నారు కూడా. దీక్షా మాలధారణ చేసుకున్నారు. వేషం మార్చారు. హిందూ ధర్మపరిరక్షకుడి వేషంలో ఆయన కనిపిస్తున్నారు. సనాతన ధర్మం (Sanathana Dharma)పై దాడి జరిగితే సహించబోమని కూడా హెచ్చరిస్తున్నారు. అంటే, ఆర్ఎస్ఎస్ (RSS) భావజాలాన్ని ఆంధ్రప్రదేశ్ రాష్ట్రంలో ఆచరణలోకి తేవడానికి సిద్ధపడ్డారని చెప్పవచ్చు. 

తిరుపతి లడ్డూ కల్తీపై ఆయన తీవ్రమైన వ్యాఖ్యలే చేశారు. అటువంటిదే మసీదుల్లో, చర్చిల్లో చేసి ఉంటే దేశం అల్లకల్లోలమై ఉండేదని వ్యాఖ్యానించారు. అంటే, రాను రాను ఆయన హిందూ దేవాలయాలను ప్రభుత్వ నియంత్రణ నుంచి తప్పించాలనే వరకు వెళ్లే అవకాశం ఉంది. చర్చి, మసీదులు స్వతంత్ర వ్యవస్థల నియంత్రణలో పనిచేస్తున్నప్పుడు హిందూ దేవాలయాలు ప్రభుత్వ నియంత్రణలో ఎందుకు ఉండాలని ఆయన వాదించే అవకాశాలు లేకపోలేదు. ఇందుకు అవసరమైన మద్దతును దేశమంతటి నుంచి కూడగట్టుకునేందుకు ప్రయత్నిస్తున్నారు. ఇందులో భాగంగానే ఆయన హిందీలో ట్వీట్లు చేస్తున్నట్లు భావించవచ్చు. దానికితోడు, తమ సోషల్ మీడియాను నిర్వహించడానికి జనసేన ప్రతినిధులు ఓ కార్పోరేట్ మీడియా సంస్థ సహకారం కోరినట్లు తెలుస్తున్నది. 

ఇక పవన్ కల్యాణ్ చంద్రబాబు నియంత్రణ నుంచి బయటపడి ఆయనకే సవాల్ విసరడానికి సిద్ధపడుతున్న సూచనలు కూడా కనిపిస్తున్నాయి. ఎన్నికలకు ముందు చంద్రబాబు చెప్పినవారినే జనసేనలో చేర్చుకుంటూ వచ్చారు. కానీ ఇప్పుడు ఆయన చంద్రబాబు మాట వినడం లేదు. మాజీ మంత్రి బాలినేని శ్రీనివాస్ రెడ్డి (Balineni Srinivas Reddy)ని చేర్చుకోవడం ఇందుకు మంచి ఉదాహరణ. చంద్రబాబు వద్దని చెప్పినా వినకుండా ఆయనను జనసేనలో చేర్చుకున్నారనే ప్రచారం ఉంది. బాలినేని శ్రీనివాస్ రెడ్డి మాజీ ముఖ్యమంత్రి, వైఎస్సార్ కాంగ్రెస్ అధినేత వైఎస్ జగన్మోహన్ రెడ్డికి సన్నిహిత బంధువు. జగన్ (YS Jagan) పట్ల ఆయన అసమ్మతితో ఉన్నారు. అలాగే సామినేని ఉదయభానును కూడా పవన్ కల్యాణ్ పార్టీలో చేర్చుకున్నారు. ఓ వైపు సనాతనధర్మ పరిరక్షకుడిగా తన రాజకీయాలను ముందుకు తీసుకుని వెళ్లడానికి కార్యాచరణను చేపడుతూనే మరో వైపు పార్టీలో చేరికలకు ఊపునిచ్చారు. 

అది చంద్రబాబుకు ఇప్పటికిప్పుడు కాకపోవచ్చు గానీ సుదూర భవిష్యత్తులోనైనా ఎసరు పెడుతుందని అంటున్నారు. వైఎస్సార్ కాంగ్రెస్ (YSR Congress) ను పూర్తిగా దెబ్బ తీసి ఆ స్థానంలోకి జనసేనను తెచ్చే ప్రయత్నాలను పవన్ కల్యాణ్ ముమ్మరం చేశారని చెప్పవచ్చు. ఇప్పటి వరకు పవన్ కల్యాణ్ మీద అవునన్నా కాదన్నా కాపు సామాజిక వర్గం నాయకుడి ముద్రనే ఉంది. వివిధ సామాజిక వర్గాలకు చెందిన సీనియర్ నాయకులను పార్టీలో చేర్చుకోవడం ద్వారా ఆ ముద్రను ఆయన చెరిపేసుకుంటారు. అదే సమయంలో బీజేపి సహకారం తీసుకుంటారు. బీజేపీ పవన్ కల్యాణ్ కు పూర్తి స్థాయిలో మద్దతు తెలపడానికే సిద్ధంగా ఉంటుంది. ఈ పరిస్థితిలో ఆంధ్రప్రదేశ్ రాజకీయ ముఖచిత్రం మారిపోతుంది. 

- కాసుల ప్రతాపరెడ్డి  (Kasula Pratap Reddy)